Toshkentda 1894 yilda birinchi real bilim yurti ochilgan. Bu bilim yurtlari real deb atalgan, chunki ular klassik gimnaziyalardan farqli o‘laroq, lotin va qadimgi yunon tillari o‘rniga zamonaviy Yevropa tillari va tabiiy fanlarni o‘rgatgan hamda talabalarni texnik va tabiiy fanlar bo‘yicha oliy o‘quv yurtlariga tayyorlagan.

Dastlab o‘quv yurti xususiy xonadonda joylashgan edi, ammo 1898 yilda me’morlar Geyntselman va Maksimov loyihasi bo‘yicha u uchun chiroyli bino qurilgan. Bu bino hozirgacha saqlanib qolgan va poytaxtning me’moriy yodgorliklaridan biridir. Qurilish uchun mablag‘ni qisman davlat, zemstvo (mahalliy hokimiyat) va Buxoro amiri Sayid Abdulahadxon ajratgan.

Bu bino barcha toshkentliklarga yaxshi tanish: u Islom Karimov shohko‘chasi (avvalgi O‘zbekiston, undan oldin Mahram) va Taras Shevchenko (Konstantinovskaya) ko‘chalari chorrahasida joylashgan. Ayniqsa, kirish joyi qiziqarli bezatilgan: arkali ayvon ikkinchi qavat uchun balkon vazifasini bajaradi.

Oktyabr inqilobidan keyin bino O‘rta Osiyo universitetiga, keyin undan ajralib chiqqan Politechnika institutiga berilgan va o‘nlab yillar davomida unda kimyo fakulteti joylashgan. Mustaqillikka erishilgandan so‘ng bu yerda turli tashkilotlar faoliyat yuritgan, bugungi asr boshida esa ta’mirlangan bino Investitsiyalar, sanoat va savdo vazirligiga (ISSV) berilgan. 2017 yilda Prezident farmoni bilan bino Madaniyat vazirligiga, keyinroq esa Madaniy meros agentligiga o‘tkazilgan.

125 yildan ortiq vaqt mobaynida o‘zgacha va noyob g‘ishtli qurilishi bilan ajralib turadigan bu bino Turkiston mustamlakachilik davri me’morchiligi yodgorligi sifatida Toshkentni bezab kelmoqda.