Shinjon-Uyg'ur avtonom mintaqasi delegatsiyasi qabul qilindi

Poytaxt hokimligida Toshkent shahar hokimi o‘rinbosari Sanjar Tadjiyev, hokimlik vakillari hamda Xitoy Kommunistik partiyasi (XKP) Shinjon-Uyg‘ur avtonom mintaqaviy qo‘mitasi kotibi o‘rinbosari, XKP Urumchi munitsipal qo‘mitasi kotibi Chjan Chju boshchiligidagi ijro organlari vakillari va yirik tadbirkorlardan iborat delegatsiya o‘rtasida uchrashuv bo‘lib o‘tdi.

Uchrashuv davomida Sanjar Tadjiyev Xitoy kapitali asosida Toshkent shahrida amalga oshirilayotgan yangi loyihalar haqida ma’lumot berdi hamda turizm sohasidagi hamkorlik natijasida Xitoy—O‘zbekiston o‘rtasidagi turizm oqimi sezilarli oshganini ta’kidladi.

O‘z navbatida, delegatsiya rahbari janob Chjan Chju Toshkent shahri bilan aloqalarni yangi pog‘onaga olib chiqish, hamkorlikni kengaytirish har ikki tomon uchun manfaatli ekanini alohida qayd etdi. 

Uchrashuv Toshkent shahri bilan Shinjon-Uyg‘ur avtonom mintaqasi o‘rtasidagi iqtisodiy va madaniy aloqalarni yanada mustahkamlash, yangi investitsion loyihalarni yo‘lga qo‘yish hamda turizm sohasidagi hamkorlikni kengaytirish yo‘lida muhim qadam bo‘lib xizmat qilishi kutilmoqda.